Gibisita sa Department of Agriculture (DA) Regional Field Office IX ang City Agriculture Office sa Dapitan City alang sa pagpahigayon og interview, project monitoring, ug site inspection sa piniling mga proyekto sa agrikultura ug pangisdaan nga gipatuman sa siyud.
Tumong sa maong kalihokan ang pagsusi sa kahimtang, pagpatuman, paggamit sa mga gihatag nga resources, ug unang mga resulta sa mga proyekto ug programa nga gisuportahan sa Department of Agriculture.
Pinaagi sa site inspection, napamatud-an sa DA Region IX team ang aktuwal nga kahimtang sa mga proyekto ug nasuta kung husto ba nga gigamit ang mga assistance ug resources nga gihatag ngadto sa mga benepisyaryo. Nakatabang usab kini sa pag-ila sa mga problema, kakulangan, ug mga aspeto nga nanginahanglan og dugang teknikal o institusyonal nga suporta.
Atol sa interview ug field validation, nakahatag usab og higayon sa City Agriculture Office ug sa mga benepisyaryo nga ipaambit ang ilang mga kalampusan, mga hagit nga ilang nasinati, ug mga suhestyon bahin sa pagpatuman sa mga programa ug proyekto nga gisuportahan sa DA.
Ang maong monitoring nagpalig-on sa koordinasyon tali sa national government ug sa City Government sa Dapitan. Nakatabang usab kini aron masiguro nga ang mga interbensyon sa sektor sa agrikultura ug pangisdaan motubag sa tinuod nga panginahanglan sa mga mag-uuma ug mga mangingisda.
Dugang pa, ang field monitoring nagsuporta sa transparency, accountability, ug evidence-based planning pinaagi sa paghatag og aktuwal nga impormasyon gikan mismo sa mga lugar nga gipatumanan sa mga proyekto. Kini nga datos mahimong gamiton sa DA ug City Government sa pag-evaluate sa kasamtangang mga programa ug sa pagplano ug pag-prayoridad sa umaabot nga mga proyekto.
Nakatabang usab ang maong kalihokan sa pag-ila sa mga maayong pamaagi nga mahimong ipadayon o sundon sa ubang proyekto, ingon man sa mga lugar nga nanginahanglan pa og dugang assistance, capacity-building, kagamitan, ug follow-up interventions.(IKEN B. GULLEM)
Source: Dapitan City Agriculture Office