Atol sa bag-ohay nga miting sa Dapitan City Local School Board, gipresentar sa City Tourism Office ang gisugyot nga “Rizal ng Dapitan” Heritage and Values Education Program, nga nagtumong sa pagpalig-on sa kolaborasyon tali sa City Government ug sa sektor sa edukasyon.
Pinaagi niini nga programa, gitinguha nga mas mapalalom ang pagsabot sa mga estudyante sa kinabuhi, mga nahimo, ug dakong kontribusyon ni Dr. Jose Rizal atol sa iyang pagpuyo sa Dapitan.
Gipunting usab ang pagpalambo sa Rizal: El Dapitanon Monument sa Lawaan Rotunda, nga dili lamang mahimong landmark, kondili usa ka open-air learning space diin mas mailhan si Rizal isip doktor, magtutudlo, siyentista, inhenyero, mag-uuma, negosyante, ug naturalista.
Himoon nga buhi nga classroom ang Dapitan, mao kini ang mas dakong tumong sa programa—nga ang mga monumento, heritage sites, ug mga makasaysayanong lugar mahimong bahin sa aktuwal nga pagkat-on sa mga kabatan-onan.
Paningkamotan usab ang pagpanalipod sa City Plaza, Relief Map of Mindanao, Rizal Shrine, ug uban pang makasaysayanong dapit pinaagi dili lamang sa mga ordinansa ug pagpatuman sa balaod, kondili pinaagi sa edukasyon ug pagpalambo sa heritage consciousness.(IKEN B. GULLEM)
Source: Dapitan City Government