Nagpahigayon og hiniusang tigom ang City Peace and Order Council o CPOC ug City Development Council o CDC sa Dipolog City niadtong Mayo 21, 2026 didto sa Social Hall sa Museo Dipolog aron hisgutan ang kahimtang sa kalinaw ug mga programa sa kalamboan sa siyudad.
Gipangulohan ni Senen O. Angeles ang maong miting samtang nagserbi isip sekretaryat si Engr. Albert S. Alimpulos, City Planning and Development Coordinator, uban sa partisipasyon sa nagkalain-laing ahensya ug opisina sa gobyerno.
Lakip sa gihisgutan atol sa tigom ang updates sa peace and order situation, pag-amendar sa 2026 20% Development Fund base sa latest Notice of Cash Allocation gikan sa Department of Budget and Management, ug paghisgot sa nominasyon sa Civil Society Organization representatives ug komposisyon sa Local Project Monitoring Committee.
Gilauman nga pinaagi sa maong tigom, mas mapalig-on pa ang koordinasyon tali sa lokal nga kagamhanan ug mga partner agencies alang sa malinawon ug organisadong pagpatuman sa mga proyekto ug programa sa Dipolog City.(JENIFFER JR. DELICA)