Gidumala sa Probinsyal nga Pangagamhanan sa Zamboanga del Norte ang 1st Quarter Meeting sa Provincial Council for the Protection of Children (PCPC) niadtong Marso 31 sa Provincial Capitol, ubos sa pagpanguna ni Gobernador Darel Dexter Uy ug Board Member Kay Marie Bolando.
Gipunting sa tigum ang pagrepaso ug pagpalambo sa mga programa alang sa kabataan, uban sa partisipasyon sa nagkalain-laing ahensya sa gobyerno ug child representatives.
Gihisgutan ang resulta sa Child Friendly Local Governance Audit (CFLGA), ingon man ang mga kausaban sa Local Code for Children. Gipresentar usab sa mga opisina ang ilang mga kalihokan nga nagtutok sa proteksyon ug kaayohan sa kabataan.
Usa sa mga highlights mao ang panumpa sa katungdanan sa bag-ong mga opisyal sa Zamboanga del Norte Children’s Association, nga nagpakita sa aktibong papel sa kabataan sa probinsya.
Sumala sa mga opisyal, ang maong tigum kabahin sa padayon nga paningkamot sa gobyerno nga mapalig-on ang proteksyon ug kalamboan sa mga kabataan sa Zamboanga del Norte.(IKEN B. GULLEM)
Source: Zamboanga del Norte Provincial News Network