PIÑAN, ZAMBOANGA DEL NORTE — Pormal nang giturn-over ang multi-purpose building o covered court sa Jose S. Hamoy Elementary School sa Barangay Segabe, Piñan niadtong Marso 30, 2026, isip dugang pasilidad alang sa mga estudyante ug komunidad.
Ang maong proyekto gitambongan sa mga opisyal sa lungsod lakip si Vice Mayor Joboy Cainta, mga miyembro sa Sangguniang Bayan, ug mga lider sa barangay nga mitabang sa pagpatuman sa proyekto aron mas mapalambo ang serbisyo sa edukasyon ug komunidad.
Gipasabot sa mga opisyal nga ang covered court magsilbing venue sa lain-laing kalihokan sama sa eskwelahan, sports, ug community gatherings, nga makahatag og mas luwas ug angay nga lugar alang sa kabataan.
Sumala sa LGU Piñan, ang proyekto bunga sa panaghiusa ug kooperasyon sa lokal nga pangagamhanan ug komunidad, nga nagpadayon sa pagpalambo sa imprastraktura alang sa mas maayong kaugmaon sa katawhan.(JENIFFER JR. DELICA)
Source: Mayor Rommel Gudmalin