Duyog sa pagsaulog sa ika-128 nga Independence Day, gibuhian pag-usab sa dagat ang 13 ka berried crabs sa Bagting Fishport sa Dakbayan sa Dapitan niadtong Hunyo 12.
Gipangulohan ang maong kalihokan ni Mayor Evelyn “Belen” T. Uy kauban si Konsehal Dennis Tan, chairman sa Committee on Agriculture, ug City Agriculturist Cyril Patangan.
Ang mga alimango giatiman ug gipadako sa Crab Breeding Station nga nahimutang sa Dapitan Aquamarine Park (DAMPA) isip kabahin sa padayon nga programa sa dakbayan alang sa pagpalig-on sa pagdumala sa aquaculture resources ug pagpreserbar sa mga yamang-dagat.
Tumong sa maong inisyatiba ang pagdasig sa responsableng pagpangisda, pagpanalipod sa mga marine species nga anaa sa yugto sa pagpanganak, ug pag-awhag sa komunidad nga mahimong aktibong kabahin sa pag-atiman sa mga kahinguhaan sa kadagatan sa Dapitan.
Gipasiugda usab sa lokal nga panggamhanan ang importansya sa pagpanalipod sa kalikupan aron masiguro ang padayon nga pagkaabunda sa mga kahinguhaan sa dagat nga nagsuporta sa seguridad sa pagkaon, panginabuhian sa mga mangingisda, ug mga oportunidad alang sa umaabot nga mga henerasyon.(IKEN B. GULLEM)
Source: Dapitan City Government