Sentro sa diskusyon sa hiniusang committee hearing sa Committee on Culture and the Arts, Committee on Indigenous Peoples’ Welfare, ug Committee on Education ang Draft Resolution No. 2026-06-002 nga nagtumong sa pagpatuman sa usa ka Community-Based Learning Program alang sa mga Subanen sa Dakbayan sa Dapitan.
Atol sa miting nga gipahigayon niadtong Hunyo 17 sa SP Conference Room, New Government Center, gihisgutan ang kamahinungdanon sa programa isip paagi sa pagpreserbar, pagpalambo, ug pagpalig-on sa Subanen nga pinulongan, kultura, ug tradisyon pinaagi sa mga kalihokan nga ipatuman sa matag barangay.
Gipunting usab sa mga miyembro sa komite ang panginahanglan sa suporta sa Local Government Unit pinaagi kang City Mayor Evelyn T. Uy aron mahimong malampuson ang implementasyon sa maong programa, nga pagapangunahan sa City Indigenous Peoples’ Mandatory Representative (IPMR).
Ang maong panaghisgot kabahin sa paningkamot sa Sangguniang Panlungsod sa Dapitan sa pagpalig-on sa pagpanalipod ug pagpreserbar sa kultura ug kabilin sa mga Subanen pinaagi sa edukasyon ug aktibong partisipasyon sa komunidad.(IKEN GULLEM)
Source: Sangguniang Panlungsod of Dapitan