Natanggong sa prisohan imbes magdula sa basketball court ang usa ka 32-anyos nga basketball player human siya madakpan sa mga operatiba sa Dipolog City Police Station sa gilusad nga buy-bust operation batok sa ilegal nga droga sa Barangay Gulayon niadtong gabii sa Hunyo 17.
Ang suspetsado, nga gitago sa ngalang alias “Glen,” minyo ug residente sa Barangay Dansullan, Polanco, apan temporaryong nagpuyo sa Purok Pinya, Barangay Sangkol, nasakpan human sa giingong transaksiyon sa ilegal nga droga nga nahitabo mga alas-8:30 sa gabii.
Nasakmit gikan kaniya ang gidudahang mga pakete sa shabu, P500 nga buy-bust money, usa ka kaha sa sigarilyo, ug usa ka Honda Beat nga motorsiklo.
Sa pagkakaron, anaa na sa kustodiya sa Dipolog City Police Station ang suspetsado samtang giandam ang kasong paglapas sa Republic Act 9165 o Comprehensive Dangerous Drugs Act of 2002 batok kaniya.(IKEN B. GULLEM)
Source: Banat Mindanao