Nagtigom ang Communication and Advocacy Committee IX niadtong Marso 3 sa opisina sa Philippine Information Agency Region IX sa Pagadian City aron palig-onon ang koordinasyon sa mga ahensya sa gobyerno sa paghatag og tukmang ug organisadong impormasyon sa publiko. Gipangunahan ni OIC-Regional Head ug Chairperson Jocelyn P. Alvarez ang miting ug gipresentar ang mga agenda nga nagtumong sa pagpaayo sa operational concerns sa komite.
Gituki sa tigom ang pag-andam sa ComAdCom IX Information Caravan 2026 nga pagahimoon sa Sulu, diin gipasabot ang panginahanglan sa aktibong partisipasyon sa tanang ahensya aron masiguro ang kalampusan sa kalihokan. Gipasiugda nga ang maong caravan kabahin sa paningkamot sa komite sa pagdala sa impormasyon diretso sa mga komunidad.
Naghatag usab og update ang Department of Information and Communications Technology Region IX sa mga programa sa BASULTA, samtang gipresentar ang resulta sa Nationwide Information Needs Assessment Survey nga magsilbing giya sa pagpalambo sa mga kampanya sa impormasyon sa rehiyon. Gipaambit usab sa mga information officers sa Isabela City, Dipolog City, ug Dapitan City ang ilang best practices sa public information.
Ang maong panagtigom nagpunting sa usa ka tumong—ang paghiusa sa mga ahensya aron mas mapalig-on ang kolaborasyon ug masiguro nga ang impormasyon nga moabot sa katawhan sa Region IX klaro, tukma, ug epektibo.(JENIFFER JR. DELICA)
Source: Zamboanga del Norte Provincial News Network