Gisugdan na sa Lokal nga Pangagamhanan sa Liloy ang pagtukod sa Cold Storage Expansion Project pinaagi sa groundbreaking ceremony nga gipangulohan ni Mayor Roberto Lim Uy Jr., isip kabahin sa pagpalig-on sa sektor sa agrikultura ug pagsuporta sa mga mag-uuma ug lokal nga prodyuser sa lungsod.
Gilauman nga ang maong proyekto makadugang sa kapasidad sa pagtipig sa mga ani human sa ting-ani, makapamenos sa post-harvest losses, ug makatabang sa pagmintinar sa kalidad sa mga produktong agrikultural aron mas mapalambo ang ilang baligya ug mapalig-on ang food security sa komunidad.
Gipasalamatan sa LGU Liloy si Congressman Adrian Michael A. Amatong alang sa padayon nga suporta sa mga programang pang-agrikultura, ingon man ang Department of Agriculture sa ilang pakigtambayayong sa pagpatuman sa maong proyekto.
Matud pa sa lokal nga pangagamhanan, padayon ang ilang pagpatuman sa mga imprastruktura ug programa nga makapauswag sa panginabuhi sa mga Liloyanon ug makapalig-on sa kalamboan sa sektor sa agrikultura sa lungsod.(JENIFFER JR. DELICA)
Source: Municipality of Liloy