Isip pagpakita ug hiniusang lakang sa pagmentenar ug kalimpyo sa baybayon, nagpahigayon ug coastal cleanup drive sa Dipolog Boulevard port area ang mga faculty members ug NSTP-CWTS students sa Saint Vincent’s College, Inc., uban aa pakigtambayayong sa City Environment and Natural Resources Office (CENRO), kaniadtong Enero 18, 2026.
Gipunting sa kalihokan ang dakong panginahanglan sa pagmentinar sa kalimpyo sa kabaybayonan aron malikayan ang pagdaghan sa plastik ug uban pang solid waste nga moagos padulong sa dagat.
Sumala sa mga organizer, ang cleanup drive usa ka paagi sa pagpalig-on sa kahibalo ug disiplina sa komunidad, ilabi na sa kabatan-onan, bahin sa hustong pagdumala sa basura ug pag-atiman sa kalikopan. Gipasiugda usab nga ang aktibong partisipasyon sa mga estudyante usa ka ehemplo sa responsableng pagkamamamayan.
Matud pa sa CENRO, ang maong kalihokan kabahin sa mas halapad nga kampanya sa siyudad batok sa polusyon ug sa pagpanalipod sa coastal resources. Gilauman nga pinaagi sa susamang mga kalihokan, mas mapalalom ang panabot sa katawhan sa kamahinungdanon sa pagpanalipod sa kinaiyahan.(IKEN B. GULLEM)
Source: Dipolog ENRO