Gitapos na sa Department of Agriculture – Bureau of Fisheries and Aquatic Resources Region IX (DA-BFAR 9) ang tulo ka bulang closed fishing season alang sa isdang tuloy (sardinas) sa kadagatan sa Zamboanga Peninsula.
Sugod kagahapong adlawa, Pebrero 16, gitugotan na pag-usab ang mga commercial fishing vessel nga mopadayon sa operasyon sa East Sulu Sea, Basilan Strait ug Sibuguey Bay human sa epektibong pagpahunong sa pagpangisda sukad Nobyembre 15, 2025.
Gipahigayon ang pormal nga pagbukas sa ika-15 nga Open Fishing Season sa Paseo del Mar sa Zamboanga City, diin gipasiugda ni BFAR National Director Elizer T. Salilig ang kahinungdanon sa padayon nga konserbasyon ug istriktong pagpatuman sa balaod.
Sumala sa BFAR, ang closed season nagtugot sa sardinas nga makapangitlog ug makadaghan pag-usab, nga nakatabang sa pagmintinar sa suplay ug kalig-on sa industriya. Ang rehiyon giila isip “Sardine Capital of the Philippines” tungod sa dakong kontribusyon niini sa de-latang sardinas sa nasud.
Gilauman nga ang pagbalik sa operasyon makabenepisyo sa liboan ka mangingisda ug trabahante sa canneries samtang gipadayon ang responsableng pagpangisda ubos sa programa sa administrasyon ni Ferdinand R. Marcos Jr. alang sa seguridad sa pagkaon ug malungtarong panginabuhian.(IKEN B. GULLEM)
Source: Zamboanga del Norte Provincial News Network