Gipatuman ni City Mayor Roberto Y. Uy ang tanang buhatan sa lokal nga panggamhanan sa pagrepaso sa ilang mga proyekto aron masiguro nga walay ngalan, hulagway, o personal nga marka sa mga opisyal nga makita sa government-funded materials.
Pinaagi sa usa ka Memorandum Order, gimando ang pagsusi sa tanang tarpaulins, signages, service vehicles, ug uban pang materyales nga may kalambigitan sa mga proyekto sa siyudad. Kon adunay makita nga kinahanglan usbon o tangtangon, kini pagahimoon dayon pinaagi sa koordinasyon sa City Planning and Development, City Engineering, ug City General Services Offices.
Tumong sa maong lakang nga ipalawom ang prinsipyo nga ang proyekto sa gobyerno alang sa katawhan ug dili alang sa personal nga kredito. Gipasabot nga ang pondo sa publiko kinahanglan magpabiling nakasentro sa serbisyo ug dili sa personalidad.
Ang direktiba maoy pagsunod sa Memorandum Circular No. 2026-006 nga gipagawas sa Department of the Interior and Local Government (DILG), nga nagdili sa pagbutang og ngalan o hulagway sa mga public officials sa mga proyekto sa gobyerno.(JENIFFER JR. DELICA)
Source: Dipolog City Government