Nagpahigayon og clean-up ug site improvement activity ang Siocon District Jail niadtong Mayo 10 ubos sa pagpanguna ni Acting Jail Warden JCINSP Achmed Aziz A. Pia uban sa mga personnel sa maong pasilidad.
Gihimo ang kalihokan aron mapalimpyo ug mapalambo ang palibot sa jail facility, ilabina ang visitors’ waiting area diin gipundok ug gibalhin ang yuta aron mapataas ang lugar ug malikayan ang pagbaha panahon sa kusog nga ulan. Gihawan usab ang agianan nga natabonan sa sagbot aron mas sayon agian ug mas luwas alang sa mga bisita ug personnel.
Kabahin usab sa operasyon ang pagputol ug pagpanghipos sa tag-as nga sagbot ug mga hugaw sulod sa pasilidad. Mokabat sa upat ka sako nga uga nga dahon, sagbot ug uban pang basura ang nakolekta ug hustong gilabay sa mga personnel.
Sumala sa Siocon District Jail, ang maong inisyatibo kabahin sa ilang padayon nga paningkamot sa pagmintinar sa kalimpyo, kahapsay ug kaluwasan sulod sa pasilidad alang sa kaayohan sa mga personnel ug mga bisita.(JENIFFER JR. DELICA)
Source: Siocon District Jail- BJMPR9