Gipahigayon ang 1st Quarter Meeting sa City Nutrition Committee niadtong Marso 4, 2026 sa buhatan ni City Mayor Roberto Y. Uy sa Dipolog City. Ang miting gidumala ni City Nutrition Action Officer Riza Jane B. Zamoras uban sa nagkalain-laing buhatan ug non-government organizations nga kabahin sa komitiba.
Atol sa panagtigom, gituki ang mga programa sa nutrisyon lakip na ang Operation Timbang Plus, MELLPI Pro evaluation, ug ang pag-reconstitute sa komposisyon sa komitiba. Gipahibalo usab nga sukad Enero hangtod Marso karong tuiga, padayon nga gipahigayon ang Operation Timbang sa 21 ka barangay pinaagi sa house-to-house nga pagsusi sa kahimtang sa nutrisyon sa komunidad.
Gipresentar usab ang mga update sa School Weighing ug ang pagpatuman sa mga programa sama sa Halina’t Magtanim ng Prutas at Gulay ug EGBU sa mga barangay. Sumala sa City Agriculture Office, 16 ka barangay na ang nakapahimutang sa maong mga inisyatiba alang sa pagpalambo sa nutrisyon ug seguridad sa pagkaon.
Giaprobar usab ni Mayor Roberto Y. Uy ang pagpalit og dugang 22 ka weighing scales alang sa nahibiling elementary schools sa siyudad aron magamit sa pagmonitor sa kahimsog sa mga estudyante, isip kabahin sa padayon nga programa sa lokal nga panggamhanan sa pagpalig-on sa nutrisyon sa kabataan.(JENIFFER JR. DELICA)
Source: Dipolog City Government