Naghatag og makapadasig nga mensahe si City Councilor Atty. Roseller L. Barinaga, Chairman sa Committee on Agriculture and Fishery, atol sa gipahigayong City Agriculture and Fishery Council Meeting, Agosto 6, 2025, didto sa Social Hall, City Hall, ning syudad sa Dipolog.
Gipasiugdahan ang maong kalihokan sa Office of the City Agriculturist ubos sa pagdumala ni Engr. Kerr N. Porlas, City Agriculturist, nga mipatawag sa mga importante nga partisipante alang sa panaghisgot sa mga isyu ug inisyatibo may kalabotan sa kalambuan sa lokal nga agrikultura ug pangisdaan.
Sa iyang mensahe, gihatagan og gibug-aton ni Konsehal Barinaga ang papel sa sektor sa agrikultura ug pangisdaan isip kinauyokan sa pagpalambo sa ekonomiya sa lungsod.
Gisuportahan usab niya ang pagpatuman sa mas lig-on nga panag-uban tali sa lokal nga kagamhanan ug sa mga mag-uuma ug mananagat aron mas epektibo ang pagpahigayon sa mga programa ug tabang sa sektor.
Tumong sa maong panagtigom ang pagpalig-on sa koordinasyon, pagpaambit sa kahibalo, ug paghiusa sa mga stakeholders aron masiguro ang malungtaron nga kalambuan sa agrikultura ug pangisdaan sa syudad.(Jumalisa Papa)
Source: Dipolog City Government