Malampusong napahigayon ang 3rd Quarter Meeting sa City Nutrition Committee (CNC) niadtong Agosto 6, 2025, alas 2:00 sa hapon, didto sa Social Hall, 2nd Floor, City Hall, ning dakbayan sa Dipolog.
Gipasiugdahan ang maong kalihokan sa City Nutrition Division sa buhatan sa Mayor, sa pagpanguna ni City Nutrition Action Officer Ms. Riza Jane B. Zamoras, uban ang presensya ni Acting City Administrator Atty. Valerie Hope Jauculan-Flores.
Gitambongan kini sa mga hepe ug representante sa lokal ug nasyonal nga mga ahensya, lakip na ang pipila ka non-government organizations (NGOs) nga sakop sa komite.
Tumong sa maong miting ang pagtuki sa mga isyu ug kalambuan kabahin sa nutrisyonal nga kahimtang sa lungsod, ilabi na ang mga inisyatibo ug programa nga ipatuman sa umaabot nga mga tuig.
Lakip sa mga gihisgutan ang mga isyu nga may kalabotan sa Reconstitution sa Local Nutrition Committee ug Local Nutrition Cluster tungod sa kabag-ohan sa komposisyon niini ilawom sa bag-ong liderato sa siyudad,
Pagpangandam alang sa MELLPI Pro–CROWN Award Maintenance Evaluation, nga ipahigayon sa National Nutrition Evaluation Team karong Agosto 12–14, 2025, ug
Pagpresentar sa draft sa City Nutrition Action Plan (CNAP) para sa tuig 2026, ug sa Local Nutrition Action Plan (LNAP) para sa 2026–2028, nga ipasaka sa Sangguniang Panlungsod alang sa aprobasyon.
Gitambongan ang miting sa mga representante gikan sa City Administrator’s Office, City Nutrition Division, DILG, PNP, City Information Office, DOST, ChildFund, City General Services Office, City Budget Office, City Health Office, DTI, PDHO, City Civil Registrar, City Veterinarian, ug CSWDO.
Padayon ang paningkamot sa City Nutrition Committee sa pagpalig-on sa koordinasyon ug epektibong implementasyon sa mga programa nga may kalabutan sa nutrisyon, kahimsog, ug kaayohan sa katawhan sa siyudad sa Dipolog.(Jumalisa Papa)
Source: Dipolog City Government