Malipayong midawat og cash gift ang 123 ka senior citizens sa Dipolog City ubos sa Republic Act 11982 o ang balaod nga naghatag og benepisyo sa mga octogenarian ug nonagenarian, sa programa nga gipahigayon Marso 16 sa D’ Food Hub and Events Center sa Barangay Miputak.
Gipasiugdahan ang kalihukan sa National Commission of Senior Citizens (NCSC) Region 9 inubanan sa Office of the Senior Citizens Affairs (OSCA) ug sa City Social Welfare and Development Office sa dakbayan. Matag benepisyaryo nakadawat og 10,000 pesos, samtang ang usa ka centenarian makadawat og 100,000 pesos ubos sa maong programa.
Gitambongan usab sa kalihukan sila OSCA Head Sancen D. Caroro ug City Social Welfare and Development Officer Patrick S. Jalapadan kauban ang mga representante sa NCSC Region 9 nga nangulo sa pagpang-apod-apod sa cash gift.
Sumala sa mga tigpasiugda, tumong sa programa nga hatagan og pinansyal nga tabang ug pag-ila ang mga senior citizens sa ilang kontribusyon sa komunidad, samtang gi-awhag usab ang uban pang kwalipikadong senior citizens nga makigkoordinar sa OSCA alang sa dugang impormasyon.(JENIFFER JR. DELICA)
Source: Dipolog City Government