Nakabenepisyo ang 18 ka mag-uuma sa lungsod sa Gutalac human makadawat og tabang pinansyal atol sa gipahigayong payout sa rice insurance subsidy kaniadtong Marso 24, 2026, ubos sa programa sa lokal nga panggamhanan.
Tumong sa maong payout ang paghatag og pinansyal nga tabang ug proteksyon sa mga mag-uuma batok sa posible nga kadaot sa ilang pananom.
Gipangunahan ang kalihokan sa Municipal Agriculture Office (MAO) sa ilawom sa liderato ni MAO-Designate Eugene Pacatang, uban sa suporta ni Mayor Eddie Justin Quimbo.
Matud pa sa LGU Gutalac, ang subsidy kabahin sa padayon nga paningkamot sa gobyerno lokal aron mapalig-on ang sektor sa agrikultura ug masuportahan ang mga mag-uuma nga nagdala sa suplay sa pagkaon sa lungsod.
Nahimo usab kining posible pinaagi sa pakigtambayayong sa Philippine Crop Insurance Corporation (PCIC), nga naghatag og suporta sa implementasyon sa crop insurance alang sa mga benepisyaryo.(IKEN B. GULLEM)
Source: LGU GUTALAC-PUBLIC INFORMATION