Mapasalamaton si Zamboanga del Norte Press Club, Inc. President, Engr. Ruel Tabada sa iyang mensahe ngadto kang City Mayor Darel Dexter T. Uy alang sa iyang pagsuporta ug pagyukbo sa nasangpit nga organisasyon atol sa gipahigayon nga “Campus Journalism Seminar & Workshop” alang sa Dipolog City Cluster kaniadtong Nobyembre 26 – 27, ning tuiga didto sa Dipolog Boulevard, Function Hall, ning dakbayan.
Ang maong kalihokan ang gipangunahan sa Zamboanga del Norte Press Club, Inc. (ZNPCI) uban sa pakigtambayayong sa DepEd-Zamboanga del Norte ug Dipolog City Schools Division uban sa suporta sa Kagamhanang Lokal ning dakbayan ug uban pang mga “sponsors”.
Mitambong usab sa maong okasyon si City Mayor Darel Detxer T. Uy alang sa pagpa-abot sa iyang mensahe kabahin sa importansya sa partisipasyon sa mga estudyante may kalabot sa jornalismo lakip na ang pagkunhod sa pagkaylap sa fake news sa “social media”.
Nagsilbi nga mga “resource speakers” ang mga miyembro sa ZNPCI sa maong “seminar/workshop” nga mao sila si City Information Officer, Mr. Lorenzo A. Aseniero II (Editorial and Column Writing), City Civil Registrar, Ms. Rosemarie P. Miranda (News and Feature Writing), Mr. Dennis Garay (Sports Writing), Mr. Lindo Roda (Radio Broadcasting ug Script Writing), City Tourism Operations Officer I, Mr. Rhey Davie Magdayao (Photojournalism), Ms. Charmaine Opendo (Mobile Journalism) ug Engr. Ruel Tabada (Online Publication).
Mikabat sa 245 ka mga “student participants” lakip na ang ilang mga “school paper advisors” gikan sa 15 ka eskwelahan dinhi sa dakbayan (pampubliko ug pribado) ang misalmot sa maong kalihokan. Aduna usa’y mga papremyo nga gipanghatag nila ni Mayor Uy ug Mr. Armand B. Frasco (Ambibo.ph) alang sa mga partisipantes nga midaog sa nagkalain-laing indigay atol sa nasangpit nga kalihokan.
(Source: Dipolog City Government Facebook page)