Aron mapalig-on ang panginabuhian sa mga mag-uuma ug mapadayon ang kalamboan sa komunidad, nagkahiusang gitanom sa R-PSB Team sa ZN 2nd Provincial Mobile Force Company (PMFC) ug sa Cympil Alsa Masa Farmers Association ang 574 ka coconut seedlings sa Purok Orchid, Situbo, Tampilisan, Zamboanga del Norte, niadtong Hunyo 13, 2026.
Gipangulohan ang kalihokan ni PLTCOL Edwin D. Verzon, Force Commander sa ZN 2nd PMFC, isip kabahin sa programa nga nagtumong sa paghatag og dugang ug malungtarong tinubdan sa panginabuhi alang sa mga benepisyaryo sa lugar.
Gilauman nga ang maong proyekto mahimong dugang nga suporta sa kasamtangang Lakatan banana plantation sa asosasyon pinaagi sa pagpalapad sa ilang mga produktong pang-agrikultura ug paghatag og mas daghang oportunidad sa kita sa mga miyembro.
Dugang pa, ang pagtanom sa mga punuan sa lubi nagtinguha usab sa pagpalig-on sa seguridad sa pagkaon ug pagdasig sa mas produktibong paggamit sa mga umahan aron makatampo sa pagtubo sa ekonomiya sa komunidad.(IKEN B. GULLEM)
Source: PNP Zamboanga del Norte 2nd PMFC