PIÑAN, Zamboanga del Norte — Opisyal nga giablihan niadtong Pebrero 20, 2026 ang Mobile Soil Laboratory sa Bureau of Soils and Water Management (BSWM) sa lungsod sa Piñan aron maghatag og libreng soil analysis sa mga kayutaan sa mag-uuma.
Sumala sa LGU Piñan, dako kini’g tabang sa sektor sa agrikultura tungod kay pinaagi sa tukmang soil analysis, mas mahibal-an sa mga mag-uuma ang hustong abono ug teknolohiya nga gamiton aron mapataas ang produksyon ug kita.
Dili lamang Piñan ang makabenepisyo sa maong mobile laboratory, kundi lakip usab ang mga lungsod sa Sibutad, Rizal, La Libertad, ug Mutia, nga nagpakita sa lig-on nga panaghiusa sa mga lokal nga panggamhanan alang sa kalamboan sa agrikultura sa distrito.
Gipasiugda sa LGU Piñan ang padayon nga pagpalig-on sa mga programang mosuporta sa mga mag-uuma isip pundasyon sa mas progresibo ug mas lig-on nga komunidad.(JENIFFER JR. DELICA)
Source: Mayor Rommel Gudmalin