Gidagsa sa baga nga pundok sa mga botante ang pipila sa mga tunghaan dinhi sa dakbayan Dipolog diin asa gipahigayon ang botohan alang sa ilang pilion nga mga politiko nga mulingkod sa katungdanan, kagahapong adlawa Mayo 12,2025.
Pipila sa mga botante, gihatagan ug prayoridad nga unang makabotar gikan sa alas 5:00 hangtod sa alas 7:00 sa buntag mao ang mga botante nga PWD, Senior Citizens ug mabdos,kini subay sa gitagana nga oras gikan sa Comelec alang sa mga nasangpit nga botante.
Kapin sa alas 7:00 sa buntag,isa-isa nga niabot ang uban pang mga botante,mga regular voters nga nidumog ug nilinya alang sa pagbotar sa tagsa-tagsa ka mga presinto.
Ang Zamboanga del Norte National Highschool mao ang isa sa mga tunghaan ang gitagana alang sa mga botanteng gusto mobotar nga gilangkuban sa 18 ka clusters, diin gipilahan sa daghang mga regular voters sayo sa buntag.
Atol sa botohan makita ang presensya sa mga Board of Election,National Citizens Movement for Free Elections (NAMFREL),mga medics gikan sa Red Cross ug ilabi na ang presensya sa kapulisan nga,hugot nga nag obserbar alang sa siguridad,kalinaw ug kahapsay sa piniliay.
Eksaktong alas 7 sa gabie niluwat ug mando ang Comelec alang sa official nga pagsirado sa botohan ug kini nagpasabot nga natapos na ang oras nga gitagana sa Comelec alang sa pagbotar sa mga botante, apan bisan paman sa maong mando sa Comelec adunay pipila sa mga botante sa usa sa mga tunghaan dinhi sa Dipolog didto sa Barra Elementary School ang wala pa natapos sa pagbotar sa gitakda nga oras sa Comelec.
Mikabat sa kapin 200 ka mga botante ang wala pa makabotar gikan sa 3 ka mga presinto diin kini nahimong kakulian sa oras sa pagboto sa katawhan, ug bisan paman sa kakulian ang mga botante madasigon gihapong nagpaabot nga sila makaboto sa ilang mga napili nga politiko.
News and photos: Medalyn Borja