Nakaboto na si Gubernatorial Aspirant Seth Frederick “Bullet” Jalosjos sa Taguilon Elementary School kagahapon alas tres sa hapon.
Dungan nga niboto ni Mayor Bullet ang iyang inahan nga kanhi aktres ug singer nga si Ms. Lorna Pal.
Giubanan sab kini sa iyang igsoon nga si Svetlana Jalosjos-de Leon.
Sumala sa Mayor, malipayon ug excited siya para karong adlawa. Gani iyang giangkon nga wala siya’y maayong tulog tungod sa iyang kalipay nga niabot na ang adlaw sa piniliay nga dugay nang gihulat di lamang sama kaniya nga usa ka kandidato kun di lakip na sa mga katawhan nga mao’y mopili sa ilang mamahimong lider.
Malaumon sab siya nga mahimong paborable sa grupo ang mamahimong resulta sa piniliay.
Nipabati sab sa iyang kamingaw si Mayor Bullet sa mga tawo nga iyang gikahinagbo sa iyang paglibot sa tibuok probinsya aron sa pagpangumpanya.
Mentras, nagka-aberya sab ang automated counting machine sa mismong presinto diin asa niboto si Mayor Bullet.
Gikinahanglan nga limpyohan ang ACM matag-karon og unya kay mohunong kini sa pagbasa sa mga balota.
Matud sa Electoral Board Chairperson Wilma Pamittan, ginapapahulay nila sa labing taas singko minutos ang ACM una sila makapadayon.
Sukad pagsugod sa pagboto anaa na sa ika-kinse ka beses silang naglimypo sa ACM.
News and photos: ANGELICA T OBINA