Dali nga miresponde ang Shift B EMS Duty Personnel sa Liloy Municipal Fire Station sa usa ka medical emergency sa Brgy. Fatima ubos sa liderato ni FINSP Dave C. Dela Cruz, Acting Municipal Fire Marshal.
Pag-abot sa responders sa lugar, ilang gisiguro ang kaluwasan sa palibot ug gisusi dayon ang kondisyon sa pasyente nga nakit-an nga conscious samtang naglingkod sa iyang motorsiklo daplin sa dalan.
Nasayran nga nakaangkon ang pasyente og grabeng samad sa wala nga tiil, lakip ang lalom ug nagisi nga mga samad taliwala ug ibabaw sa mga tudlo sa tiil nga adunay kusog nga pagdugo. Aduna usab siyay gagmay’ng samad sa tuo nga tuhod.
Gihatagan dayon og first aid sa BFP responders pinaagi sa paglimpyo sa samad, pagbutang og povidone-iodine ug sterile dressings, ug pagbugkos gamit ang roller bandage aron mapugngan ang pagdugo.
Human sa initial treatment, ligtas nga gidala sa responders ang pasyente ngadto sa Liloy Integrated Health District Hospital alang sa dugang medical evaluation ug hustong pagtambal.
Nagpakita na usab ang BFP-Liloy sa ilang kahandam ug paspas nga pagresponde sa mga emerhensya aron masiguro ang kaluwasan ug kinabuhi sa katawhan.(JENIFFER JR. DELICA)
Source: BFP R9 Liloy Fire Station