465 ka mga kabatan-onan gikan sa nagkalain-laing lungsod sa Zamboanga del Norte ang nakabenepisyo sa Special Program for Employment of Students (SPES) nga gipahigayon pinaagi sa Department of Labor and Employment (DOLE) ug Public Employment Service Office (PESO) isip suporta sa ilang pagpadayon sa edukasyon.
Gisugdan ang deployment sa mga benepisyaryo human sa orientation ug briefing niadtong Mayo 14 sa Dipolog City, diin gipahibalo nga magserbisyo sila gikan Mayo 15 hangtod Hunyo 11 ning tuiga sa nagkalain-laing buhatan ug partner offices sa probinsya.
Ang SPES nagtumong sa paghatag og temporaryong trabaho alang sa mga estudyante, Out-of-School Youth (OSY), ug mga dependent sa displaced workers aron matabangan sila sa gasto sa eskwela ug adlaw-adlaw nga panginahanglan.
Sumala ni Charmie A. Yu, Acting Provincial Administrator ug PESO Manager, ang programa dili lamang para sa pinansyal nga tabang kondili usa usab ka paagi sa pagtudlo sa kabatan-onan og disiplina, responsibilidad, ug kahibalo sa serbisyo publiko.
Gipasabot usab sa orientation ang salary sharing scheme diin 60 porsyento sa suweldo pagasagubangon sa Provincial Government samtang 40 porsyento gikan sa DOLE.
Nagpadayon ang Provincial Government ubos sa administrasyon ni Governor Darel Dexter T. Uy ug DOLE sa ilang paningkamot nga mapalig-on ang mga programa nga naghatag og oportunidad ug suporta sa kabatan-onan alang sa mas lig-on nga kaugmaon.(IKEN B. GULLEM)
Source: Zamboanga del Norte Provincial News Network