Gipasiugdahan sa Barangay Local Government Unit (BLGU) sa Sta. Catalina, pinaagi sa Sangguniang Kabataan (SK), ang usa ka Feeding Program isip kabahin sa pagselebrar sa Nutrition Month sa La Libertad, Zamboanga del Norte, Hulyo 13, 2025.
Nagpakita og suporta ang mga personahe sa La Libertad Municipal Fire Station pinaagi sa paghatag og lecture kabahin sa fire safety ug emergency preparedness. Gitudloan ang mga ginikanan ug kabataan sa mga angay buhaton aron malikayan ang sunog sa panimalay ug ang hustong pagresponde sa panahon sa emerhensya.
Lakip sa mga gipanghatag nga pagkaon atol sa maong Feeding Program mao ang ilang pinalabi ug nutrisyunal nga Homemade Veggie Balls, nga gilangkuban sa nagkalain-laing klase sa gulay, puno sa nutrisyon. Gikataho nga daghang kabataan, uban sa ilang mga ginikanan, ang nakapahimulos sa maong kalihokan.
Gidayeg sa mga residente ang paningkamot sa SK ug BLGU sa Sta. Catalina tungod sa ilang walay puas nga suporta sa pagpalambo sa kahimsog, nutrisyon, ug kaluwasan sa ilang komunidad.
Ang maong kalihokan usa lamang sa daghang mga aktibidad nga gipahigayon sa barangay isip pag-obserbar sa Nutrition Month Celebration, nga nagtinguha nga mapalig-on ang panaghiusa ug kahibalo sa katawhan kabahin sa importansya sa pagkaon og himsog ug pag-andam sa panahon sa emerhensya.(Jumalisa Papa)
Source: BFP R9 La Libertad Municipal Fire Station