Dali nga miresponde ang Bureau of Fire Protection Dipolog City Fire Station pinaagi sa BFP Ambulance Shift B, ubos sa pagpangulo ni FSINSP Aprilyn B. Barbaso, sa usa ka aksidente sa kadalanan niadtong Enero 23, 2026 sa Herrera Street, Barangay Miputak, ning siyudad.
Alas siyete onse sa gabii niabot ang Emergency Medical Service team sa lugar ug ilang nakita ang usa ka biktima nga nahigda sa dalan, adunay samad ug gamay nga pagdugo sa tuo nga dunggan. Gilusad dayon ang hapsay nga pagtan-aw sa kahimtangan sa biktima aron masiguro ang hustong pag-atiman.
Gihatagan daun og paunang lunas ang biktima, gisul-oban og cervical collar, ug dayong gidala sa Zamboanga del Norte Service Cooperative Hospital alang sa dugang nga medikal nga pagtambal.(JENIFFER JR. DELICA)
Source: BFP R9 Dipolog City Fire Station