Nagpahigayon og nagkadaiyang outreach activities ang Bureau of Fire Protection Region 9 sa Zamboanga del Norte isip pagsaulog sa Batch Anniversary sa mga personnel nga natawo sa mga bulan sa Abril, Mayo, Hunyo ug Hulyo.
Gipangulohan ni FSUPT Richard C. Timosa, DSC ang sabayang kalihokan nga naglakip sa pagdonar og fire extinguisher ug feeding program sa Linay Elementary School sa Sitio Linay, Barangay Diwan, Dipolog City, ingon man sa Carmelite Home for Children sa Barangay Sicayab.
Mipahigayon usab ang BFP og tree planting activity sa Barangay Lawigan, Labason, ug nagdonar og fire extinguisher ngadto sa St. Vincent Ferrer Parish isip kabahin sa kampanya sa pagpalig-on sa fire safety ug pag-atiman sa kalikupan.
Sumala sa BFP-9, ang “Batch Acts of Kindness” nagpakita sa ilang padayon nga pag-alagad sa komunidad pinaagi sa mga buhat sa kalooy, pagpalambo sa kahibalo sa fire safety ug pag-amuma sa kalikupan, gawas pa sa ilang responsibilidad sa pagresponde sa mga emerhensiya.(JENIFFER JR. DELICA)
Source: BFP R9 Zamboanga del Norte Office