Padayon ang paningkamot sa Dapitan City sa pagpanalipod sa kinaiyahan human lima ka berried crabs o alimango nga adunay mga itlog ang malampusong gibuhian balik sa Dapitan River niadtong Mayo 11.
Personal nga gipangunahan ni Mayor Evelyn T. Uy uban ni City Agriculturist Cyril Patangan ug sa City Agriculture Office ang maong environmental activity nga nagtumong sa pagpadaghan sa populasyon sa alimango sa suba.
Matud pa sa City Agriculture Office, dakong tabang ang pagbuhi sa berried crabs tungod kay kini adunay liboan ka itlog nga makatabang sa padayong reproduksyon sa mga alimango sa maong lugar.
Gipasiugda usab sa lokal nga panggamhanan nga kabahin kini sa ilang padayong kampanya alang sa environmental sustainability ug pagpreserbar sa biodiversity sa Dapitan.
Gawas sa konserbasyon, gilauman usab nga makatabang kini sa panginabuhian sa mga mangingisda nga nagsalig sa kahinguhaan sa suba alang sa ilang kita ug pagkaon.
Sumala sa administrasyon ni Mayor Uy, bisan ginagmay nga lakang sa pag-atiman sa kinaiyahan mahimong mosangpot sa dugayng kaayohan alang sa komunidad ug umaabot nga mga henerasyon.(JENIFFER JR. DELICA)
Source: Dapitan City Government