Giduso na sa Department of Agriculture–Philippine Rural Development Project (DA-PRDP) ug Provincial Government sa Zamboanga del Norte ang dugay nang gihandom nga Farm-to-Market Road project sa Godod human gipahigayon ang technical meeting niadtong Mayo 12 sa Zamboanga del Norte Convention and Exhibition Center.
Naghiusa sa maong meeting ang mga opisyal gikan sa DA-PRDP national, regional, ug provincial offices aron hisgutan ang mga kinahanglanong dokumento ug clearances alang sa pagpadayon sa proyekto ngadto sa sunod nga proseso sa approval.
Lakip sa target nga proyekto ang rehabilitasyon ug concreting sa Lanawan–Tambalang–Balakan–Salug–Sarawagan–Raba road network ug Dipopor–Poblacion Godod road segment.
Gipangunahan ang technical team ni DA-PRDP RPCO IX OIC-Regional Executive Director ug Project Director Vener Dilig uban sa mga technical specialists gikan sa RPCO ug NPCO.
Mitambong usab ang Provincial Project Management and Implementing Unit nga gipangulohan ni Vice Governor Julius Napigquit isip representante ni Governor Darel Dexter Uy.
Sumala kang Napigquit, dako ang paglaum sa probinsya nga sa dili madugay masugdan na ang proyekto nga dugay nang gihulat sa mga residente ug mag-uuma sa Godod.
Gilauman nga ang maong dalan makapadali sa pagdala sa mga produkto gikan sa kaumahan ngadto sa merkado ug makahatag og dugang oportunidad panginabuhian ug kalamboan sa maong lungsod.(JENIFFER JR. DELICA)
Source: Zamboanga del Norte Provincial News Network