DAPITAN CITY — Nadugangan pa ang mga driber nga nakadawat og ayuda human 221 ka motorcab drivers sa Dapitan City ang nakabenepisyo sa ₱5,000 fuel subsidy payout nga gipahigayon sa Department of Social Welfare and Development (DSWD) Region IX sa Government Center niadtong Mayo 12.
Gihatagan og cash assistance ang matag benepisyaryo aron makatabang sa ilang adlaw-adlaw nga gasto ilabina sa pagsaka sa presyo sa produktong petrolyo.
Lakip sa nakadawat ang 21 ka driber nga wala makakuha sa unang payout niadtong Abril ug 200 ka bag-ong rehistradong driber nga nadugang sa programa niaging bulan.
Sumala sa DSWD, kabahin kini sa padayong pagpalapad sa ayuda aron mas daghang transport workers ang matabangan panahon sa kalisod sa ekonomiya.
Nagtinabangay sa implementasyon sa payout ang DSWD Region IX ug City Social Welfare and Development Office (CSWDO) aron masiguro ang hapsay ug paspas nga pagpagawas sa ayuda ngadto sa mga benepisyaryo.
Gipangunahan usab sa mga representante sa DSWD ang maong payout nga milungtad sa tibuok adlaw ug nahuman nga walay naitalang problema.(JENIFFER JR. DELICA)
Source: Dapitan City Government