Padayon nga nadani ang mga kabatan-onan sa Dapitan City ngadto sa sports, arts ug interactive activities atol sa ikaduhang semana sa “Batang Dasig” program sa city government.
Midagsa ang mga bata ug kabatan-onan sa nagkadaiyang aktibidad nga nagtumong sa pagpalambo sa ilang talento, disiplina ug pakig-socialize pinaagi sa face-to-face interaction.
Lakip sa gipahigayon nga mga aktibidad ang storytelling sessions, sports clinics, games, values formation ug art workshops nga gipangunahan sa mga facilitators ug volunteers.
Usa sa nakakuha og dakong interes sa mga partisipante mao ang Arnis training, diin sumala kang Coach Chris Hamoy, misaka ang gidaghanon sa mga kabatan-onang gustong makat-on sa maong sport..
Gawas sa pagdiskubre sa talento, tumong usab sa “Batang Dasig” nga maminusan ang oras sa paggamit og gadgets pinaagi sa paghatag og mas produktibo ug healthy nga mga kalihokan alang sa kabatan-onan.
Matud pa sa City Government of Dapitan, padayon nga gipalig-on sa programa ang teamwork, communication skills ug self-confidence sa mga kabatan-onan pinaagi sa aktibong partisipasyon sa komunidad.(IKEN B. GULLEM)
Source: Dapitan City Government