Giapud-apod sa Dipolog City ang ayudang pinansyal alang sa kapin 3,000 ka mag-uuma ubos sa Presidential Assistance for Farmers and Fisherfolks Program nga gipangunahan sa Department of Agriculture Region IX uban sa lokal nga panggamhanan.
Gipahigayon ang payout didto sa D’Food Hub and Events Center sa Barangay Miputak sugod Abril 29 hangtud Abril 30, diin ang matag benepisyaryo nakadawat og ₱2,325 aron makatabang sa ilang gasto sa produksyon ug transportasyon.
Sumala sa DA, tumong sa programa nga matabangan ang sektor sa agrikultura nga naapektuhan sa pagsaka sa presyo sa petrolyo tungod sa tensyon sa Middle East nga nakaapekto sa operasyon sa mga mag-uuma.
Mitambong sa kalihokan sila Mayor Roberto Y. Uy, Congresswoman Irene G. Labadlabad ug mga opisyal sa DA, diin gipasalamatan ang nasudnong gobyerno sa padayon nga suporta, samtang gipasiugda nga makatabang ang maong ayuda sa pagpadayon sa lig-on nga produksyon sa agrikultura sa siyudad ug probinsya.(JENIFFER JR. DELICA)
Source: Dipolog City Government