Gilauman ang dakong partisipasyon sa publiko sa umaabot nga Kadiwa ng Pangulo (KNP) nga ipahigayon sa Ecopark, Upper Turno sa Abril 28–29, 2026, nga maghatag og baratong pagkaon ug direktang merkado alang sa lokal nga mag-uuma ug mangingisda.
Lakip sa mga highlight sa kalihokan ang pagbaligya sa bugas sa presyong P20 matag kilo, nga ipatuman sugod ala una sa hapon sa matag adlaw. Aron masiguro nga mas daghang pamilya ang makabenepisyo, gilimitahan kini sa 10 kilos matag panimalay kada bulan.
Gawas sa bugas, mapalit usab ang nagkadaiyang presko nga utanon, prutas, ug isda, ingon man mga processed products, handicrafts, ug ready-to-eat foods nga direkta gikan sa mga lokal nga prodyuser. Tumong sa programa nga maputol ang dugang patong sa presyo pinaagi sa diretsong pagbaligya gikan sa mag-uuma ug mangingisda ngadto sa konsumidor.
Target nga makabenepisyo sa maong inisyatiba ang mga sektor nga nagkinahanglan, lakip ang mga pamilyang ubos ang kita, rehistradong mag-uuma ug mangingisda ubos sa RSBSA, 4Ps beneficiaries, senior citizens, PWDs, Indigenous Peoples, ug solo parents. Gikinahanglan ang pagdala og valid ID alang sa beripikasyon.
Isip dugang insentibo, ang unang 150 ka mamalitay sa Abril 28 makadawat og libreng vegetable o fruit tree seedlings aron dasigon ang pananom sa panimalay ug dugang panginabuhian.
Kini nga inisyatiba, nagtinguha sa pagpalapad sa akses sa baratong pagkaon samtang gipalig-on ang kita ug produksyon sa lokal nga sektor sa agrikultura ug pangisdaan.(IKEN B. GULLEM)
Source: Zamboanga del Norte Provincial News Network