Mobalor sa kapin P10,000 nga kantidad sa ilegal na drugas ang malampusong nakumpiska sa mga personahe sa kapulisan gikan sa usa ka indibidwal pinaagi sa gikasa nga joint operation sa mga personahe sa Station Drug Enforcement Team (SDET) sa Siocon Municipal Police Station (MPS), uban sa koordinasyon sa 2nd Zamboanga del Norte Provincial Mobile Force Company (ZNPMFC),PDEA-9, mga alas 11:40 ang takna sa kabuntagon niadtong Hunyo 16, 2026 didto sa Sitio Sinunuc, Barangay Tibangao, Siocon, Zamboanga del Norte.
Naila ang dinakpan nga indibidwal nga usa ka 31 anyos nga lalaki, minyo, usa ka mag-uuma ug residente sa Barangay Tibangao, Siocon, Zamboanga del Norte, kinsa nakumpiskahan ug sachet nga adunay sulod nga gidudahang shabu nga gibana-bana nga mutimbang sa 1.5 gramos nga adunay kantidad nga P10,200.00, uban sa buy-bust money ug uban pang may kalabutan nga mga butang.
Ang mga nakumpiska nga ebidensya sa droga isumite sa Zamboanga del Norte Forensic Unit, Liloy Satellite Office, alang sa laboratory examination, samtang ang suspek nagpabilin ubos sa kustodiya sa Siocon MPS alang sa hustong disposisyon ug pagpasaka sa angay nga mga kaso sa paglapas sa Republic Act No. 9165, o nailhan usab nga Comprehensive Dangerous Drugs Act of 2002.
Gipamatud-an pag-usab sa mga operating unit ang ilang pasalig sa pagpakusog sa mga operasyon batok sa ilegal nga droga ug pagmintinar sa kalinaw ug kahusay sa probinsya.(MEDALYN U. BORJA)
Source: ZNPPO