Usa sa mga gidamgo karon sa Provincial Council for the Protection of Children (PCPC) ang Balay Pag-asa nga matukod alang sa lalawigan sa Zamboanga del Norte aron mahimong pinuy-anan sa mga batang biktima sa pag-abuso.
Kini ang usa sa mga gihisgutan sa PCPC 2nd Quarter Meeting nga gipahigayon kagahapon sa Hall 3, Capitol Building, Estaka ning dakbayan sa Dipolog sa may alas 9:00 ang takna sa buntag.
Si Atty. Olive Corrine O. Lacaya, Provincial Attorney ang nahimong Presiding Officer nga mi-representar ni PCPC Chairman, Gov. Rosalina “Nanay Nene” Jalosjos ug si PSWD Officer Doc. Jose P. Mante ang mihatag sa opening remarks atol sa maong panagtigum.
Gilakbitan gilayon ni Mante ang problema sa malnutrisyon sa intiro lalawigan nga matud niya “very alarming” tungod sa padayong pagtaas niini hangtud karong tuiga.
Usa ang lungsod sa Sindangan nga adunay pinaka-daghang mga barangay ang nag-una sa maong prolema diin gitutukan kini sa administrasyon ni Nanay Nene nga mahatagan kini ug solusyon sa madaling panahon.
Sa report usab sa Zamboanga del Norte Provincial Office (ZNPPO), mokabat sa 38 ka mga kaso sa rape ang natala sa ikaduhang quarter karong tuiga diin anaa sa 3 anyos ang pinakabatang biktima nga mismo ang kaugalingong amahan ang suspetsado.
Gisaysay usab sa mga opisyales nga aduna pay laing kaso sa lungsod sa Sirawai nga duha ka mga anak nga babaye nag-edad 4 ug 5 anyos ang biktima sa pagpanglugos sa ilang amahan.
Samtang adunay 2 ka kaso sa Drug Abuse nga 15-16 years old nga mga minor de edad ang natala sa ZNPPO.
Kini nga datus nakapa-alarma usab sa buhatan sa kapolisan ning lalawigan ug nagmando sa mga ginikinan nga andam usab nilang protektahan ug panalipdan ang ilang mga anak ilabi na ang mga babaye.
Mihatag usab sa ilang mga reports ang Provincial Health Office nga nagmonitor karon sa Immunization ug Breast feeding programs nga gitunol sa ilang buhatan sa mga kabarangayan ning lalawigan.
(Source: Provincial Information Center ZaNorte Facebook page)