Giablihan sa Dr. Jose Rizal Memorial Hospital o DJRMH ang ilang bag-ong Solar Power Generating Carport atol sa pagsaulog sa ika-165 nga anibersaryo sa pagkatawo ni Dr. Jose P. Rizal sa Dakbayan sa Dapitan.
Gitambongan ang maong kalihokan ni Zamboanga del Norte 3rd District Congressman Adrian Amatong nga maoy guest speaker. Sa iyang mensahe, iyang gipasiugda ang mga mithi ni Rizal sama sa patriotismo, integridad, kahusayan ug matinud-anong pag-alagad isip panudlo alang sa mga healthcare worker sa kasamtangang panahon.
Gipangulohan usab ni Medical Center Chief II Dr. Maria Dinna Viray-Pariñas ang programa nga gitambongan sa mga empleyado sa ospital, stakeholders, mga representante sa PhilHealth ug mga estudyante nga miapil sa nagkadaiyang kalihokan ug patimpalak kabahin sa kinabuhi ni Rizal.
Sumala ni Cong. Amatong, dakong lakang ang bag-ong solar power carport sa pagpalig-on sa mas luntian ug mas lig-on nga sistema sa serbisyo panglawas sa probinsya. Pinaagi sa paggamit sa enerhiya gikan sa adlaw, makatabang kini sa pagpakunhod sa konsumo sa kuryente ug pagsiguro sa padayon nga serbisyo sa ospital alang sa katawhan sa Zamboanga del Norte.(JENIFFER JR. DELICA)
Source: Zamboanga del Norte Provincial News Network