Malampusong nasikop sa mga tinugyanan sa balaod ang usa ka nailhang bag-ong Street Level Individual atol sa gihimo nga hiniusang buy-bust operation mga alas 7:30 hangtod alas 8:15 sa buntag niadtong Pebrero 11, 2026, didto sa Purok Malipayon 1, Brgy. Poblacion, Kalawit, Zamboanga del Norte.
Ang maong dinakpan naila nga usa ka 20 anyos nga lalaki, ulitawo, walay trabaho, ug residente sa nasangpit nga lugar kinsa gidakop pinaagi sa mga personahe sa Kalawit Municipal Police Station (MPS), uban sa mga elemento sa 2nd ZNPMFC, ug nakumpiskahan sa gibana-bana nga 1 gramo nga gidudahang shabu nga adunay gibanabanang kantidad nga PHP 6,800.00.
Nakumpiska gikan sa nasangpit nga suspek mao ang nagkadaiyang heat-sealed transparent plastic sachet nga adunay sulod sa gituohang shabu ug uban pang butang nga dili druga.
Ang nadakpang suspek gipahibalo sa hinungdan sa iyang pagkadakop ug mga katungod sa konstitusyon sa pinulongan nga iyang nasabtan ug anaa na kini karon sa kustodiya sa Kalawit MPS alang sa hustong disposisyon.
Samtang ang nakumpiska nga ebidensya sa droga itugyan ngadto sa Zamboanga del Norte Forensic Unit alang sa laboratory examination.(MEDALYN U. BORJA)
Source: ZNPPO