Gisugdan sa kagamhanang lokal sa dakbayan sa Dapitan ang dakong Proyekto alang sa pagtukod sa bag-ong Merkado Publiko, human nakapalit ug nabayran niadtong Agusto 29, 2025 ang 1.4 ka Ektaryang Yuta, nga atua nahimotang sa Barangay Linabo nga nagkantidad og Php32,700,000.00, apil na ang tanang balayronon ug alang na usab sa mga papeles niini.
Matud pa, nga ang nasangpit nga lakang nahimong posible human gi-aprobahan sa City Development Council (CDC) niadtong Agusto 15, 2025 ang Reprograming ug Allocation sa Pondo aron masiguro ang Budget alang sa maong Proyekto.
Dugang pa niini, ang bag-ong Merkado Publiko, nga karon Opisyal nang napanag-iya sa Lungsod, adunay Organisado nga Wet ug Dry Sections, insakto nga Parking Area, ug mas kombinyenteng lokasyon nga dali adtuan sa Publiko. Tungod kay dako ang luna, mahimong daghan nga mga mamaligya-ay ang makatagamtam niini, maingon man, daghan usab ang mga pwesto nga makahatag og dugang oportunidad sa panginabuhian sa mga Dapitanon. Matod pa ni Mayor Belen Uy, nga ang Merkado mao matud pa ang usa sa iyang gi-unang prayoridad, sukad sa pagsugod sa iyang termino isip Mayor sa nasangpit nga Siyudad.
Gikalipay usab sa mga katawhan ang maong proyekto, ilabi na ang klarong aksyon sa Siyudad, pinaagi sa ligdong nga pagpaningkamot sa ilang Mayor, aron matubag ang dugay na nilang hangyo, alang sa usa ka Limpyo ug Luwas nga Merkado Publiko alang kanila. Kini ang nagsilbing unang hugna sa pagtukod sa bag-ong Merkado nga magahatag og dugang benepisyo ug maipasigarbo sa mga Dapitanon.(Julius Esmade)