DIPOLOG CITY — Pormal nang giturn over niadtong Pebrero 16, 2026 ang bag-ong Loading and Unloading Bay nga adunay canopy sa DPDS Central, Dipolog City, atol sa usa ka seremonya nga gipahigayon mismo sa project site.
Ang proyekto, nga gipatuman ubos sa POW Reference No. 2025-03-0017, naglangkob sa 110.90-square-meter nga bay area ug 25.71-metros nga pader nga may 2.20 metros nga kahabogon. Gipundohan kini pinaagi sa Special Education Fund (SEF) ubos sa School Building infrastructure, nga adunay programmed cost nga ₱511,518.00 apan nahuman sa ₱474,661.00, nga nagpakita sa episyente nga paggamit sa pondo sa publiko.
Gisugdan ang konstruksyon niadtong Setyembre 16, 2025 ug nahuman niadtong Setyembre 26, 2025 subay sa giaprobahan nga implementation schedule.
Gitambongan ang turnover ceremony nila City Engineer Engr. Susan B. Ualat, City Councilor Atty. Roseller L. Barinaga, ug City Schools Division Superintendent Dr. Ma. Liza R. Tabilon, nga misaksi sa pormal nga pagdawat sa nahuman nga pasilidad. Gilauman nga ang bag-ong istruktura maghatag og mas luwas, organisado, ug episyenteng lugar alang sa loading ug unloading activities sa eskwelahan.(JENIFFER JR. DELICA)
Source: Dipolog City Government