Mainitong gidawat sa Local Government Unit (LGU) sa Roxas, pinaagi sa Rural Health Unit (RHU), ang bag-ong Doctors to the Barrios (DTTB) physician nga si Dr. Jan Jeahnette Labastida-Marmita, kinsa moalagad sa mga lumulupyo sa lungsod isip kabahin sa pagpalig-on sa serbisyo panglawas sa komunidad.
Sumala sa RHU-Roxas, dako ang ilang paglaom nga pinaagi sa kahibalo, kahanas, ug dedikasyon ni Dr. Labastida-Marmita, mas mapalapad ug mapalambo pa ang paghatag sa batakang serbisyo medikal ilabina sa mga komunidad nga nagkinahanglan og dugang nga pag-atiman.
Gipasalamatan usab sa LGU ang Department of Health (DOH) Zamboanga Peninsula Center for Health Development, ilabina si Gloria Oracoy, DMO IV, tungod sa padayon nga suporta ug pagtalaga og DTTB physician sa lungsod sa Roxas.
Gihatagan usab og pagpasidungog ang suporta ni Municipal Mayor Ismael Renqguijo Jr., Vice Mayor Rolando Yebes Jr., mga miyembro sa Sangguniang Bayan, Municipal Administrator Nestor Gonzales, mga department heads, ug mga barangay officials sa malungtarong pagpatuman sa mga programa sa panglawas.
Nagpahayag ang RHU-Roxas sa paglaom nga ang pag-abot sa bag-ong DTTB doctor makatampo sa mas episyente ug mas accessible nga paghatag og serbisyo panglawas alang sa tanang Roxasnon.(IKEN B. GULLEM)
Source: RHU Roxas