Usa ka babaye ang giluba sa ilang silingan nga wala nay kinabuhi nga nahidangat sa hospital didto sa Barangay Labrador Polanco, sa kagabhion Dec.3 ning tuiga.
Ang biktima nailhan sa pangalan nga si Gels Jesulga, hamtong ang panuigon, dalaga, adunay usa ka anak ug residente sa nasangpit nga lugar.
Ang suspetsado nailhan usab nga si Camelo Imperial, 50 anyos ang pangidaron ug silingan ra usab sa biktima.
Matud pa sa imbistigasyon sa mga kapolisan ang duruha adunay panaglalis mahitungod na sa tubig nga molanab sa tugkaran sa suspetsado kung ang biktima magpahigayon ug washing sa iyang sakyanan.
Kahinumduman nga sa mga nakalabayng semana nagkatinubagay ang suspek ug ang live-in partner niini sa biktima tungod kay ang tubig nga hinugasan sa sakyanan didto man magsubay sa iyang tugkaran sa panimalay sa suspek.
Human niadtong hitaboa ang suspek nipatawag sa biktima sa ilang barangay aron mahimuan ug katin awan ang problema tali nilang duha, apan kini wala gilayon matagad sa mga barangay officials tungod kay adunay aktibidad ang maong lungsod hinungdan nga na busy sa El Toro Festival sa lungsod sa Polanco.
Matud pa sa mga nakasaksi sa wala pa mahitabo ang pagpatay nianang kaudtohon ang suspek nakita nga nagbaid sa kutsilyo ug nanghipos na sa iyang mga gamit ug giandam na usab ang motorsiklo.Apan kini wala panumbalinga sa iyang pamilya tungod kay wala pod nila damha nga himoon sa ilang kabanay ang brutal nga pagpatay.
Sa mga alas 8:00 kapin kon kulang ang takna kagabhion ang biktima nga si Gesulga pugsanon nga giguyod sa suspek gikan sa koral sa iyang balay ug gidala sa ngitngit nga bahin.Didto na nahitabo ang brutal nga pagpatay ug gani giingnan pa sa suspek ang biktima nga “modagan paka ha dili naka nako buhion pa”.
Ang biktima nakaangkon ug pito ka samad linobaan sa nagkadaiyang parte sa iyang lawas ug gani nayagyag pa ang tinae niini hinungdan sa iyang hinanaling kamatayon.
Ang suspetsado nisakay gilayon sa iyang motorsiklo ug niingon sa mga nakasaksi matud pa Ayaw mo kabalaka kay padung nako para mu surrender sa kapolisan.
Apan ang suspetsado hangtud karon wala gayud mi surrender ug nagpabilin pa nga kining gawasnon ug kasamtangan na kining gipangita sa mga kapulisan.(Angelica T. Obina)
Source: BANAT MINDANAO