Usa ka batan-ong atleta gikan sa Barangay Marupay, Roxas, Zamboanga del Norte ang mipatunghag dakong garbo sa Pilipinas human niya makuha ang kampeonato sa Association of SouthEast Asian Nation (ASEAN) Open Youth Tournament nga gihimo sa Hanoi, Vietnam.
Ang kampeon mao si Rui Simon Tagad, team captain sa IJCC Redfox ug miyembro sa RGG Team, nga malampusong nagrepresentar sa nasud batok sa mga kusgan nga atleta gikan sa nagkadaiyang nasod sa Southeast Asia.
Pinaagi sa iyang kusog nga performance ug liderato sa dula, nakadaog siya sa titulo isip champion sa maong internasyonal nga torneyo.
Sumala sa mga kauban ug tigpasiugda sa sports sa probinsya, ang kalampusan ni Tagad resulta sa taas nga lebel sa disiplina, padayon nga pagbansay, ug determinasyon bisan pa sa kakulang sa pasilidad nga kasagaran atubangon sa mga atleta sa probinsya.
Ang iyang kadaugan giila sa lokal nga komunidad sa Roxas isip usa ka ehemplo nga ang talento sa mga batan-on sa Zamboanga del Norte makalabaw sa internasyonal nga entablado.(IKEN B. GULLEM)
Source: via Roxas Zambonorte