Kapin sa 20,000 ka panimalay sa Dapitan City ang diretsong nakabenepisyo sa Pamaskong Handog sa lokal nga pangagamhanan, diin bugas ang gipang-apod-apod isip tabang alang sa mga pamilya karong panahon sa Pasko.
Ang mga benepisyaryo naglangkob sa mga panimalay gikan sa tanang 50 ka barangay sa siyudad, base sa datos sa Community-Based Monitoring System (CBMS). Pinaagi niini, nasiguro nga ang tabang naabot sa daghang pamilya nga nagkinahanglan, ilabina sa mga ordinaryong mamumuo, senior citizens, ug mga panimalay nga adunay limitadong kita.
Daghang residente ang mipahayag og pasalamat sa nadawat nga bugas, nga giila nila nga dako nga tabang sa pag-andam sa pagkaon sa tibuok kapaskuhan. Matud pa sa pipila ka benepisyaryo, ang maong hinabang nakapamenos sa ilang gasto ug nakahatag og kalinaw sa hunahuna samtang nagasaulog sa Pasko uban sa pamilya.
Gipatuman ang Pamaskong Handog pinaagi sa panaghiusa sa City Government of Dapitan, City Social Welfare and Development Office (CSWDO), mga City Councilors, ug mga opisyal sa barangay, aron masiguro nga ang matag benepisyaryo makadawat sa hustong tabang ug mapadayon ang diwa sa pagtinabangay sa komunidad.(IKEN B. GULLEM)
Source: City Government of Dapitan