Mipahigayon og panagtagbo ang African Swine Fever (ASF) Task Force ning dakbayan adlawa ng Oktubre 26, 2021 sa may alas 2:00 ang takna sa kahaponon didto sa 2nd floor, Social Hall, City Hall ning siyudad.
Ang nasangpit nga tigum ang gipangunahan sa buhatan sa City Veterinarian, pinaagi ni City Veterinarian, Dr. Imelda Villacrusis, isip Chairman, uban na sa mga nagkalain-laing miyembrong buhatan sa maong Task Force.
Tumong sa maong tigum mao ang pagtuki sa unod sa Orden Ehekutibo no. 2021-33 nga nagmugna sa African Swine Fever Task Force dinhi sa siyudad nga giluwatan ni City Mayor Darel Dexter T. Uy, pinetsahan ug Septembre 28, ning tuiga.
Sigun sa nahimong hinungdan nga kining maong kamandoan ang gimugna mao nga aron hugtanong matutokan ang posibleng pagtumaw unya sa kaso sa ASF dinhi sa dakbayan sa umaabot nga mga adlaw, nga giilang usa ka makuyaw nga sakit alang sa mga baboy susama sa ubang dapit dinhi sa nasud.
Matud pa nga ning kasamtangan, ang atong lalawigan lakip ning atong dakbayan ang wala pa’y kaso sa ASF, busa kinahanglan gayud nga kini ang paga-bantayan pag-ayo, aron maseguro nga dili gayud kini makasulod dinhi sa atong dapit.
Sigun sa mga gihimong pagtuon, nga kining ASF ang wala pa’y tambal hangtud karon, diin ang pagtakboy niini dinhi sa nasud ang naka-apektar og dako sa atong industriya sa baboyan ug ngadto sa mga pangibuhi-an ug sa agrikultura.
Atol sa tigum kagahapon, giila ang mga miyembrong buhatan nga milangkob sa ASF Task Force, lakip na ang mga responsibilidad niini, diin sila mahisakop nga grupo nga gimugna ilawom sa maong Task Force sama sa RAPID ACTION TEAM, SURVEILLANCE TEAM, QUARANTINE TEAM, CENSUS TEAM ug IEC TEAM.
Lakip sa gituki kagahapon mao ang laraw sa pagmugna pinaagi sa pagtudlo sa gitawag og “Biosecurity Officers, dinha sa mga kabaranggayan aron maoy mohimo sa hugot nga pag-monitor kalabot na sa kahimtang sa pagbuhi og baboy, sanglit nga dinhi sa atong dakbayan, pulos ra man nga backyard piggery.
Dugang usab nga gihisgotan mao ang dugang pagpalapad sa “Registry System for Basic Sectors”, diin ang mga nagbuhi og baboy ang ginahanglan nga mo-rehistro, diin human niini, sila ang mopa-“insured” sa ilang mga binuhing baboy ngadto sa Philippine Crop Insurance Company, alang sa kasegurohan, kon ugaling kini ang magkasakit og mamatay.
Sa katapusang hugna sa maong tigum, ilawom sa hiniusang kagustuhan sa mga miyembro, ang grupo ang mipasar sa usa ka resolusyon pinaagi sa pagdasun ni Engr. Kerr Porlas alang ngadto sa Departamento sa Agrikultura, alang sa dugang pagpasabot ug updates kalabot na sa programa niini nga “Repopulation Program”, partikular sa programa niini nga pahulam alang sa mga nagbuhi og baboy, aron ilang magamit dinhi sa pag-prodyuser sa dugang mga baboy, aron mapabilin ang supply niini, og mahimong maka-ayuda kini ngadto sa mga dapit nga nahutdan sa suplay sa baboy gumikan sa ASF dinhi sa atong nasud.
Gawas ni Dr. Villacrusis, ang nasangpit nga tigum ang gitambongan sa mga miyembrong buhatan pinaagi nila ni City Administrator, Atty. Prince Gonzales, DILG, CLGOO Sherrie Machutes, Police Corporal Lannie Ballano (PNP), Admin Officer V, Alan Francisco Bengua (CIO), City CENRO Mercedita Guerrero, Dr. Darwin Abadilla (Bureau of Animal Industry), City Agriculturist, Engr. Kerr Porlas, Engr. Teresita Tubungbanua (City Planning Office) Sanitation Officer, Ariel Saldariega (CHO) Mr. Lester Ong, President, ZN Hog Raisers Association President, Mr. Dexter Nacaytuna, Dipolog City Meat Dealers Association President, Rosebelle Barbaso ug uban pa.
(Source: Dipolog City Government Facebook page)