Gibuksan na sa Municipality of Polanco ang kaugalingong Animal Bite Treatment Center nga usa ka dako ug makapasigarbo nga kalampusan sa lokal nga panggamhanan. Tungod niini, dili na kinahanglan moadto pa sa laing lungsod ang mga residente nga napaakan sa hayop kay adunay na’y pasilidad nga motubag sa maong emerhensiya sulod mismo sa munisipyo.
Gitukod ang maong sentro aron mas mapaduol ug mapasayon ang paghatag og serbisyong medikal sa katawhan. Gilauman nga makatabang kini sa pagpamenos sa peligro sa rabies ug uban pang komplikasyon pinaagi sa dali ug hustong pagtambal sa mga kaso sa animal bite.
Pormal usab nga gidawat sa lungsod si Dr. Brian Langreo, DTTB gikan sa Department of Health, nga motabang sa paghatag og serbisyong medikal ug molibot sa mga barangay aron mas maabot ang komunidad.
Padayon ang lokal nga panggamhanan sa pagpalig-on sa mas sayon, mas duol, ug mas accessible nga healthcare alang sa tanang taga-Polanco.(JENIFFER JR. DELICA)
Source: Mayor Ying Uy