Bun-og ang nahiagoman sa usa ka amahan homan kini gikulata sa kagalingong anak nga lango sa ilimnong makahubog didto sa Purok Sidlakan, Brgy. Turno, Dipolog City, mga alas 5:00 ang takna sa hapon niadtong Marso 3,2026.
Ang maong biktiman kinsa naka angkon ug mga samad, naila nga usa ka 61 anyos nga senior citizen, usa ka panday ug residente sa nahisgutang lugar ,amahan sa suspek . Samtang ang suspek naila nga 37 anyos nga anak nga anak sa biktima, usa ka construction worker ug residente sa samang lugar.
Sa gihimong imbestigasyon nagbutyag nga sa wala pa ang insidente, ang suspek nag-inom og ilimnong makahubog uban sa mga paryente sa gawas sa ilang balay ug sa ulahi nahubog ug nagbagutbot, naglabay og mga botelya.
Sa dihang misulay ang biktima sa pagpakalma kaniya, ang suspek nasuko pag-ayo ug balik-balik nga gisumbag ang iyang amahan sa nawong sa wala pa mokalagiw.
Tungod sa panghitabo girespondehan gilayon kini sa kapulisan, uban sa mga barangay tanod, nagpahigayon og hot pursuit operation ug malampusong nadakpan ang suspek duol sa lugar sa insidente.
Ang suspek gipahibalo gilayon sa iyang mga katungod sa konstitusyon ug gidala sa Dipolog City Police Station alang sa kustodiya ug hustong pagpasaka sa angay nga mga kaso.
Samtang biktima nga amahan sa suspke gidala sa balay tambalanan alang sa medikal nga pagtambal.(MEDALYN U. BORJA)
Source: ZNPPO