Daling mitubag ang mga personnel sa BFP-Piñan sa usa ka vehicular accident nga nahitabo sa Barangay Poblacion South, diin usa ka babaye ang naangol ug nanginahanglan dayong medikal nga tabang.
Sa pag-abot sa mga responder, ilang nakita ang pasyente nga alerto ug naglingkod sa sabakan sa iyang amahan sa tunga sa dalan. Sa inisyal nga assessment, nagreklamo kini og grabeng kasakit sa wala nga paa nga adunay pain scale nga 10/10, ug adunay mga timailhan sa posibleng bali. Nakit-an usab ang mga garas sa duha ka ubos nga bahin sa iyang mga bitiis.
Gihatagan dayon og first aid ang pasyente pinaagi sa paglimpyo sa mga samad ug pagbutang og splint sa naangol nga paa aron malikayan ang dugang kadaot samtang wala pa madala sa ospital.
Human sa paghatag sa kinahanglang emerhensiyang pag-atiman, gidala ang pasyente sakay sa BFP ambulance padulong sa Dr. Jose Rizal Memorial Hospital sa Dapitan City alang sa dugang nga eksaminasyon ug medikal nga pagdumala.
Sumala sa BFP-Piñan, ang paspas ug koordinadong pagtubag sa insidente kabahin sa ilang padayong paningkamot sa pagpanalipod sa kinabuhi ug paghatag og episyenteng serbisyo sa panahon sa emerhensiya.(JENIFFER JR. DELICA)
Source: BFP R9 Piñan Fire Station