Daghang mga residente gikan sa nagkalain-laing barangay sa lungsod sa Rizal ang nakadawat og pinansyal nga ayuda pinaagi sa Assistance to Individuals in Crisis Situation (AICS) payout nga gipahigayon sa Perfecto C. Cebedo Cultural and Sports Center sa Rizal Zamboanga del Norte.
Kini nga kalihokan gipangulohan sa opisina ni First District Representative Roberto “Pin Pin” Uy isip kabahin sa padayon nga paghatag og suporta sa mga katawhang nanginahanglan aron matabangan sa ilang mga adlaw-adlaw nga panginahanglan ug uban pang emerhensiyang sitwasyon.
Mitambong usab sa payout sila Municipal Mayor Marissa D. Manigsaca, Vice Mayor Jose B. Salac, ug mga miyembro sa Sangguniang Bayan, kinsa mipahigayon og courtesy visit ug nagpahayag og pagpasalamat kang Congressman Uy alang sa iyang padayon nga pagdala og mga programang makatabang sa mga Rizalnon.
Matud pa sa lokal nga panggamhanan, ang maong inisyatiba nagpakita sa lig-on nga panaghiusa sa nasyonal ug lokal nga gobyerno aron masiguro nga ang mga serbisyong sosyal ug pinansyal nga ayuda maabot sa mga labing nanginahanglan.(IKEN B. GULLEM)
Source: Municipality of Rizal